Forbetra pasienttryggleik og gode pasientforløp er viktige mål ved overgangen til elektronisk kurve- og legemiddelhandtering. Pasientinformasjonen vil følgje pasienten uavhengig av kor han eller ho er sjukehuset, og med ein gong vere tilgjengeleg for alle som har bruk for han. Dette vil bidra til å redusere uønskte legemiddelhendingar og støtte opp om gode pasientforløp.

For helsepersonell vil den elektroniske kurveløysinga forenkle arbeidskvardagen blant anna ved å gi støtte til avgjerder om behandling og pleie.

Pilotering av regional løysing

Helse Vest skal innføre regionale løysingar. Kurveløysinga som blir teken i bruk, er velprøvd og i drift på ei rekkje sjukehus i Tyskland. I hovudsak er løysinga ferdig utvikla, men prosjektet har arbeidd lenge og grundig med å tilretteleggje for versjonen i Helse Vest.

Pilotering handlar om å teste ut alle delar ved løysing som generell funksjonalitet, utprøving av nye arbeidsprosessar som følgje av at vi går over til elektronisk kurve, teste at integrasjonar med medisinsk teknisk utstyr og andre delar av pasientjournalen fungerer, og at overføring mellom avdelingar går som planlagt. For å få til ei utprøving som dekkjer alle desse områda, vil det gjennomførast ei omfattende pilotering, som skal skje på Lungeavdelinga, Medisinsk avdeling og Mottaksklinikken ved Haukeland universitetssjukehus i 2015.

Lungeavdelinga er først ut og starta opp 5. mai

– Den elektroniske kurva kjem til å endre mykje av arbeidsflyten vår framover. Kurva vil blant anna hente inn informasjon frå andre system på ein rask, nyttig og funksjonell måte, noko som kjem både pasienten og helsepersonell til gode. Det blir nok ein krevjande pilotperiode, for vi veit alle kor vanskeleg det kan vere å innføre nye, komplekse system. Men vi er positive og vi gler oss, seier avdelingsdirektør på Lungeavdelinga, Kahtan Al-Azawy.